Norconsult Ísland vinnur með Norconsult í Svíþjóð og Svenska kraftnät að verkefninu KLUF 374. Markmið verkefnisins er að þróa og besta staðlaðar lausnir fyrir stagfestur háspennumastra af gerð A í sænska raforkuflutningskerfinu.
Verkefnið er hluti af áframhaldandi uppbyggingu, viðhaldi og endurnýjun flutningskerfis Svenska kraftnät. Lausnirnar eru ætlaðar bæði fyrir nýframkvæmdir og endurfjárfestingar í núverandi kerfi.
Norconsult Ísland gegnir veigamiklu hlutverki í verkefninu og ber ábyrgð á verkefnastýringu, hönnunarstjórn og hönnun. Sérfræðingar Norconsult á Íslandi annast meðal annars þróun hönnunarforsendna, burðarþolsgreiningar og samræmingu útreikninga og teikninga.
Í KLUF 374 er lögð áhersla á þróun og bestun járnbentra steinsteyptra stagfesta fyrir A-gerð háspennumastra. Fyrirliggjandi hönnun er yfirfarin og uppfærð með það að markmiði að:
- uppfylla núverandi hönnunar- og öryggiskröfur;
- bæta byggingarhæfni og endingu;
- einfalda framleiðslu og framkvæmd;
- stuðla að hagkvæmri efnisnotkun án þess að skerða burðarþol eða áreiðanleika.
Við hönnunina eru hefðbundnir handreikningar samræmdir við ítarleg töluleg reiknilíkön. Meðal annars eru notuð ólínuleg líkön í IDEA StatiCa og ANSYS til að greina burðarhegðun, staðbundna spennudreifingu, sprungumyndun og kraftflutning milli stáls og steinsteypu.
Verkefnið byggir á fyrri verkefnum Norconsult fyrir Svenska kraftnät á sviði undirstaðna og stagfesta. Þar á meðal er stöðlun undirstaðna fyrir 400 kV háspennumöstur af B- og H-gerð. Í þeim verkefnum voru þróaðar sameiginlegar hönnunarforsendur og staðlaðar lausnir sem styðja við skilvirkari hönnun, framkvæmd og langtímaeignastýringu.
Með KLUF 374 er byggt áfram á þeirri reynslu og þekkingu. Samstarf Norconsult á Íslandi og í Svíþjóð við Svenska kraftnät sameinar sérþekkingu úr fyrri háspennulínuverkefnum með það að markmiði að þróa traustar, hagkvæmar og staðlaðar lausnir fyrir framtíðaruppbyggingu sænska raforkuflutningskerfisins.
